No Maysaak A Pintor

Sunset illustrated by Daniel John Quiamas, 8

No maysaak a pintor,
Dawatek, sika koma ti maris
Ti pintak:

Ditoy kadaratan,
Biagem ti puraw ken nangisit
A ladawan ti malemko-
Kas arapaap,
Pagandapem ti aglaylayag
A bangka a dildilpatan ti sipnget;
Gameram iti kiaw ken kolordapo
Dagiti inkortinak a nalitem nga ulep;
Pagbalitokem ti nakusnaw
A rupa ti lumlumned nga init
Ket iti panagsarmingna
Iti asul a taaw,
Agminarka iti pingping
A sallapingaw a kallid.

Ngamin, kudilmo
Ti bullalayaw a makabingngi
Iti nairut nga isem,
Ti mangted maris
Kadagiti naikuadro a buya
A maitaptapkal ditoy
Naallon a muging.

SIKA A MUSA

bayat a nakailadak ditoy kadaratan
limmabaska a paraiso iti sanguanak-
immanghel a rupa,
pagat-abaga a buok,
ken sininginan
ti sangapirgis a kurtina
a langeb ti naimmos
a pannakadamilim.
pinagatabmo ti riknak
o, dapan-dapan nga Eba.

ket ginuyod ‘ta likudmo dagiti matak,
ti widawidmo isu’t lung-ay dagiti allon
a mangtapliatapliak ti barukong;
atiwmo pay ti dayag dagiti batbato
a nagsabong, sika a musa 
iti minuyongan ti taawko.

ket immadayoka,
gineppasmo ti sirmatak,
nagarinsaed ti danumko
ket immati ti kaadalmak.
o, saka-saka a musa,
sika ti kalman ti arapaap
kas unnok, kaemekto latta ti pusok.

Tangtangadek Ti Lumlumned A Rupam

Tangtangadek Ti Lumlumned A Rupam

Corazon Fermin Quiamas
6/9/2008 3:56:39 PM

Tangtangadek ti lumlumned
A rupam iti taaw
Dagiti aggugubal nga allon
Dagiti balikas a pataw
Kaippasngay a ragsak
Di masikog nga arapaap.

Lumnek ti rupam
A sarming ti rupak
A rupa ti sumingisingto manen
Nga init; raniagka
A pika nga iwagis
Ti natarengteng a panawen iti barukong
Ti nakarukob a langit
A mangsalpot ti puso
Ti agdudungsa a matam.

PenshadowTangTiLumARup