BAY-ANTA DAGITI PAMMABALAW

BAY-ANTA DAGITI PAMMABALAW
Sung by Vhen Bautista and Marieta Rafanan
Words by Corazon F. Quiamas
Music by Avelino Bautista
Music Arranged by Israel Allen Pascua
Aweng Records Music Production & Distribution
Released by Rosa Records
From the back to back album “Bay-anta Dagiti Pammabalaw” Vhen Bautista and Marienta Rafanan

Imnas, no aggiddanta a maipasngay
Babaen laeng iti ipapatay
Kayatmo ngata tapno pagtangepenta
Duapulo a kalgaw a kaadayota?

Manongko, sika ti angesko
Ngem dika koma sumuko
No adayot’ baet dagiti bibigta
Pagsaipento latta’t panagayatta

Bay-anta dagiti pammabalaw
Agkibinta iti langalang nga inaldaw
Saan nga isudat’ mangiddep iti ragsak
Sika ken siak, aglawlawta napusaksak

Bay-anta dagiti pammabalaw
Dita itulok ayan-ayatta agbaaw

Awan gayam panawen ti ayat
Saan a pisikal, saan a mapaksiat
Ta ti patempateg dina iginggina
Ti baetta nga awan kondisionna.

TULONGANNAK A MANGIDANIW

BANNAWAG MAGAZINE,Abril 27,2009 Issue, nakaipublikaran ti daniw,"Tulongannak..."

isuronak a mangidaniw
iti yuulog ti init
tapno ikur-itna iti danum
ti rikna nga inlamina dagiti tugotti nagmalem iti tapoktapok
ken naasok a tangatang; kasanok
nga ibugasan ti nalabbasit
a muging ti laud a mukon iti yuulog

ti saltek tapno umagep iti daga,
kalpasan a naiwaragawagna
ti maris ti anges nga angsen
ti barado nga agong

iti sumaruno nga aldaw, bulan,
tawen wenno siglo a sirotsirot
iti kasisiglot iti nagkaadu nga arapaap?
ti lasag a puon ti nadaras

nga ilulong-aw ngem pakailutlotan met
gayam; tulongannak a manggammat
ti nagalis a panunot a sumrek-rumuar
kadagiti naluneng nga abut ti turay

ta kasla paltat a bumanang-es,
sumangdo kaniak, sumingil ket kumilikili
ti ut-ot dagiti saan a nagbanag nga insaltek
dagiti nangyabrasa iti kari

iti piglapiglat a ridaw ti puso
dagiti nakudrep a mata
ken iti nabangles a balikas
dagiti nagpabanias a simmuksok a dila-

wen, iti kaawan sungbat
no apay nga adda maibusel
ngem di met agukrad;
ta awan met ngamin

biag ti plastik a sabong
a maipapa-ayat kadagiti padak
a mamati iti itlog a kari a di met
mapessaan; aglalo no bulonan

ti kanalbuong ti umas-asok
a ngiwat ket kasla an-anakan nga aso
ti kararua a mangibaag
ti sangsangadangan a biagna-

agangek ket dilpatanna ti sileng
ti pirak sa idilpatna met
kadagiti ngiwat dagiti agang-angek
nga uken a mangdildilpat iti tapok
iti uneg ti nakaraykay nga abut;

a, tulongannak…

tulongannak a mangidaniw
ti paragpagan a kasasaad a kibkibkiban
dagiti bao nga umuli-umulog
iti aglatlati nga alambre ti killo a linteg.