KADAGITI TAKIAGKO
No dagiti takiagmo
ket agdisso iti barukongko
ket ti buokmo, agdissuor
kadagiti ramayko
a kimmalatkat iti likudam,
apay a diak mayaddang
dagiti sakak,
diak maitarayan ti panangkamat kaniak
ti dumanapeg a puso?
Ngem ketdi,
itaytayabnak ti angesmo
daytoy ti kimmapas a bagik
itulokko iti panangidiktarmo.
Ayatko, kabukbukodam dagitoy matak
iturongmo ida , panurnorenda
ti tangatang a kudil
bilangek dagiti siding,
ti panagbitekda a kas bituen,
ti panagtapuakda a layap
kadagiti dakulapko.
cfq/1/8/13
Leave a comment