ITI TUNGGAL YAADDANGMO

Ti BANNAWAG MAGAZINE, Issue Marso 15, 2010, a nakaipablaakan ti daniw, ITI TUNGGAL YAADDANGMO. Sipud daydi panangbitbitmo kadagiti dua a takiag ket inubbanak, masaksaksiakon bayat ti panagdakkelko ti in-inut a panagbalbaliw ti pakabuklam- sumalsalimuoten ti sang-awmo A mayapiras iti pingping ken kadagiti nalamiis a tanem dagidi unas a pinasag dagiti arigna agkakamangen nga atep dagiti kabarbaro a balbalay. kunam, isuda idi ti mapespes A nasam-it a taredted ti biag dagidi a sakada ngem inus-osen ti nabara a pul-oy. inuksoben ti modernisasion ti sangatanapan a kinalangtom. Sumilsilengen ti pagan-anaymo kadagiti agkikinnidmat a lawag dagiti silaw kadagiti sementado a kalkalsada wenno kadagiti aggiinnabrasa a pasdek pagtagilakuan ken paglinglingayan Dagiti damuna laeng ti agkikita. agdadanggayen dagiti kannaway, pagaw ken martines a mangkankanta iti pammakada nga ayug. saanen a mangeg ti garakgak dagiti aglagidlagid a dalluyon Iti dapanmo, rinimbawanen ti danarudor dagiti agsisilpo a luglugan wenno ungor ti mauy-uyos nga anges a mangdangdanggay iti rigodon ti panagdur-as. ngem nasken a magnaka ket pidutem Amin a lumgak nga init a maisagut. saanto a makaasneb ti pangta ti kasla kamuol a maibatog nga ulep, natalgedkanto ta addaka iti desdes a nalinongan iti nagsasaip a bullalayaw. Sadino man iti turongem, Ewa Beach ammok nga igpilnakto latta agingga a mailunesmo ti agdama; ket iti panangyaruatmo ti baro a terno ti bannawag, nakaukradto manen dagiti takiag dagiti semiliak a paubba kenka. ____________ By CORAZON F. QUIAMAS

SARUNGKARANKANTO MANEN, HONOKA’A

Ti BANNAWAG MAGAZINE, Issue Oktubre 5, 2009 a nakaipablaakan ti daniw ni Corazon F.Quiamas, SARUNGKARANKANTO MANEN, HONOKA'A.

panurnorekto manen dagiti ulep iti rabaw

ti dandani agukrad a maysa nga oras;

tammidawakto  ti Maui, Molokai ken Lanai-

isuda a naiwarakiwak a petalo ti plumeria

iti taaw, bayat a sulsul-oyennak ti regget

nga agdisso iti pakabuklam.

kas kulibangbang iti Oahu,

umaykanto sublian  ket agakar-akarakto

kadagiti minuyongam,

ipapaskonto manen a pidilen

dagiti kaddiram-os iti linnaaw a sabong

iti aglawlawmo; lukiblukibekto

dagiti namaris a payakko, kas iti pananglukibko

kadagiti namaris a panid ti saanko pay

a nayurit a daniw; kumpasakto ti kansion

dagiti tumatayab manipud iti birhen a kabakiram

ket iti berde a kabambantayam, ipintakto

iti muging ti buya ti biag a saboran

dagiti pangen ti baka ken karnero;

katikatekto dagiti atitiddog a daldalanmo

a namagsisilpo kadagiti matimtimpurok

a kinalasbangmo- lasuekto ditoy barukong

a kas agnanayon a tuktukonek a lagip;

ta iti rabii, parisannaka dagiti agrimrimat

ken agpipirutong a balbalay ditoy Ewa Beach

kas agtatapaw a bituen iti saklot

dagiti nalinak a dalluyon , kas kalinak

ti mabangbang-aran a rikna

bayat nga ipampannimidko ‘di natutudo

a kanito a panagkarapkarapko dita hardinmo.

DITOY EWA BEACH

Iti Fort Weaver road, kas kulalanti
Nga agin-iniin dagiti lugan uray pay
Iti kariwetan nga agsapa.

Kada gilap ti payak a gangat
Ti agmimiray a sipnget, yanninagna
Ti imahen ti namnama iti sango ti manobela

A sangsanggolen ti maap-apradan inana
A takiag tapno adda maipempen a bigat
Ti agdardarepdep a kasasaad.

Iti umaldaw, agparada dagiti bullalayaw
A nagbestida iti angep, agsasalada iti sirok
Dagiti agdadagsen nga ulep ken arrap nga init

Iti sikigan ti Diamond Head; isuda
Dagiti rangtay a mangitunda
Iti agtatapaw nga arapaap

Ta, nupay narigat ti biag ditoy
Kunada a paraiso , kas iti panagmulagat
Latta dagiti limmasong a mata;

Kas iti pannakabennat latta
dagiti sumuksuko a lasag-
Isu dagitoy ti mangtaginayon ti pitik

Iti bukod a barukong
Ditoy ken dagiti barukong dagiti napanawan
Dita Filipinas nga ina a daga.

DITOY ISLA PARAISO

ibagam, agnaedka ditoy paraiso
iti arubayanmo, kas uong, agkaratubo
dagiti bullalayaw;
nupay maipatupattok dagiti leddag nga ulep
pumayso amin a darepdep
no ammo ti nasaldet a ramramay a burasen
dagiti rinaraay a tudo a buggo ti tikag.

kas koma ditoy lugarmo, nababa dagiti nangato
nga arapaap ta dagiti balbalay iti Ewa Beach,
bituenda iti parbangon nga agtatapaw
iti barukong ti taaw-
liwliwam a buya bayat iti panagpatpataraymo iti H1 freeway
a naggapu iti maikatlo a panggedam
ta dimo samiren ti bannog ken dagiti masungsungkadan a matam,
nupay agtuken koman dagita takiag. ngamin,
isu pay a nayon ti maipuruak kadagiti napapateg
iti adayo a lugar a napanawam. ta kunam,
saan a mapidpidut dagiti yamanen, narigat-
ta uray nabantot ‘ta bagi, pilit a bumangonka; alistuem
a tiliwen dagiti sumiag a kalikagum iti paraangan
ti sardam gapu ta dagita dagiti naamo
a layap a silawto ti pamiliam ken kababagiam.

Bigaten, Aloha Lei

Corazon Fermin Quiamas
7/7/2008 4:29:24 PM

Daytan ti bigat, Aloha Lei
Iburaisna manen
Dagiti agsasallangupang
A mabuya:

Ti kaririing
A rupa ti init
Nga agsarsarming
Iti umas-asok a danum
Ti Pearl Harbor;
Ti agsangsanggir a bullalayaw
Iti sakaanan ti Pearl City;
Ti tipping a Diamond Head
A sipsippayoten dagiti eroplano;
Ne,ti pay bantay Mililani
A nakaabungot
Iti angep. Uray dita
H1 Freeway a barabad ti Waipahu,
Buyaendatayo met ditoy Ewa Beach
Dagiti kallukag a kannaway
Kas water lilies
Nga agtatapaw iti baybay.

A, nagpintasen ti pakabuklan
Ti Oahu, Aloha Lei
Pintas ti Oahu a sumaruno laeng
Iti birhen a pakabuklam
A buybuyaek kada seppegennak
Nalamiis a rabii.

Copyright 2008 By Corazon F. Quiamas

Kastoy Koma Amin A Didiosen

Nasamit ti pinagdildila
Dagiti didiosen a nagrayo kenka, Ewa Beach-
Kadagidi kanito a napisit ti buzzer
Ket nabingngi ti ridaw ti isem
A nakaipitan ti plataporma
A rukkuasan ti balud a trapiko
Tapno agalikwaksay a kari.

Mariknak, wen, makitakon ita
Ti nalawan a dalanmo, Ewa Beach-
Uratmo a kumamang iti puso ti Honolulu
A nangseseb ngumayngayemngem a sennaay;
Banag dagidi nasamit a balikas
A nayareng-eng iti awanan oras
Nga oras dagiti simmirip ken nagkatok
Nga arimpadek; a nangipasimsim di nasamit
A balikas, awan kasinginna a gatad;
Tirad a maibiat; pangwadan a mangtudas
Didiosen ‘diay lugar, wen ‘diay lugar
Nga agpasakbab iti pirak.

#