DITOY ISLA PARAISO

ibagam, agnaedka ditoy paraiso
iti arubayanmo, kas uong, agkaratubo
dagiti bullalayaw;
nupay maipatupattok dagiti leddag nga ulep
pumayso amin a darepdep
no ammo ti nasaldet a ramramay a burasen
dagiti rinaraay a tudo a buggo ti tikag.

kas koma ditoy lugarmo, nababa dagiti nangato
nga arapaap ta dagiti balbalay iti Ewa Beach,
bituenda iti parbangon nga agtatapaw
iti barukong ti taaw-
liwliwam a buya bayat iti panagpatpataraymo iti H1 freeway
a naggapu iti maikatlo a panggedam
ta dimo samiren ti bannog ken dagiti masungsungkadan a matam,
nupay agtuken koman dagita takiag. ngamin,
isu pay a nayon ti maipuruak kadagiti napapateg
iti adayo a lugar a napanawam. ta kunam,
saan a mapidpidut dagiti yamanen, narigat-
ta uray nabantot ‘ta bagi, pilit a bumangonka; alistuem
a tiliwen dagiti sumiag a kalikagum iti paraangan
ti sardam gapu ta dagita dagiti naamo
a layap a silawto ti pamiliam ken kababagiam.