DITOY EWA BEACH

Iti Fort Weaver road, kas kulalanti
Nga agin-iniin dagiti lugan uray pay
Iti kariwetan nga agsapa.

Kada gilap ti payak a gangat
Ti agmimiray a sipnget, yanninagna
Ti imahen ti namnama iti sango ti manobela

A sangsanggolen ti maap-apradan inana
A takiag tapno adda maipempen a bigat
Ti agdardarepdep a kasasaad.

Iti umaldaw, agparada dagiti bullalayaw
A nagbestida iti angep, agsasalada iti sirok
Dagiti agdadagsen nga ulep ken arrap nga init

Iti sikigan ti Diamond Head; isuda
Dagiti rangtay a mangitunda
Iti agtatapaw nga arapaap

Ta, nupay narigat ti biag ditoy
Kunada a paraiso , kas iti panagmulagat
Latta dagiti limmasong a mata;

Kas iti pannakabennat latta
dagiti sumuksuko a lasag-
Isu dagitoy ti mangtaginayon ti pitik

Iti bukod a barukong
Ditoy ken dagiti barukong dagiti napanawan
Dita Filipinas nga ina a daga.

GAYYEM

manawnaw met ti bara ti panaglalangen
iti salukob ti sangatangatangan
a kalawa ti ulimek.
ulimek nga abbong dagiti agkaraidasay
nga arapaap, bayat iti naundayen a panagpipinningki

dagiti tadem dagiti agsusupadi
a kinahenio ken kalikagum;
degdegan ti bumbumsog a pingping
ti pul-oy a mangpalpalamiis
latta iti gagar-abrasa dagiti kumkumleb

a balikas a makidanggay,
makirinnay-aw ken manginspirar
tapno rumegta koma nga agkali
ti panunot iti minas nga imet
ti Literatura Ilokana.

dinak koma ibati iti law-ang
a diak maibugasan iti kaipapanan.
kaduaennak a kas agila
nga agdakiwas tapno makitak

ti direksion ti makaulaw ken umir-irut
nga aligusgos ti daga a rinames
ti nakaparsuaan.
sumpekta iti eropuerto a kabakiran-
pilitenta nga aningasen ti ungto

ti ulimek ti ayug ti orkestra
dagiti napadisi a tumatayab;
iti taaw, isublita ti kinabirhen ti danum
manipud kadagiti allon ti  lagip
a laktalaktawen dagiti naamo

ken rinaraay nga ikan-
ta pati ngaminen iti barukong
ti baybay ket agkebbakebba
kadagiti agkarabettak a mitsa
ti rigat ti biag?

inta iti taltalon-
agiddata iti berde a karuotan a naarpawan
iti makalindaw a rengngat ti tikag;
burasenta dagiti karamukom nga arbis a kakaemen
dagiti nakapurpuraw a bibig dagiti ulep

ket iti ungto ti alinuno
dagiti nagsusupadi
a pampanunot, idiay nga itukitta
dagiti tinukel ti muging tapno agruting
iti dakulap ti makaliplipaten nga agdama.