SIKA A MUSA

bayat a nakailadak ditoy kadaratan
limmabaska a paraiso iti sanguanak-
immanghel a rupa,
pagat-abaga a buok,
ken sininginan
ti sangapirgis a kurtina
a langeb ti naimmos
a pannakadamilim.
pinagatabmo ti riknak
o, dapan-dapan nga Eba.

ket ginuyod ‘ta likudmo dagiti matak,
ti widawidmo isu’t lung-ay dagiti allon
a mangtapliatapliak ti barukong;
atiwmo pay ti dayag dagiti batbato
a nagsabong, sika a musa 
iti minuyongan ti taawko.

ket immadayoka,
gineppasmo ti sirmatak,
nagarinsaed ti danumko
ket immati ti kaadalmak.
o, saka-saka a musa,
sika ti kalman ti arapaap
kas unnok, kaemekto latta ti pusok.