( Hawaii Tsunami Warning
Pebrero 27, 2010, 4:01 iti agsapa )
manipud iti taaw, kas serpente
a naguyas
iti ridaw ti isla paraiso:
inlukaisna dagiti kalub dagiti matak,
impalukna ti saong iti agan-anninek a barukong
ket nabaringkuasak.
nakitak ti rurog a rupana,
gimmilap dagiti natadem a kumpayna,
ket dagus a binalkotko dagiti napapateg-
ti kapisik,
dagiti annakko,
dagiti papeles,
ti kompiuter,
ket natatalman dagiti ririingna a saltek.
indissok isuda iti lugar a nangato,
iti rabaw dagiti ulep,
iti dapan ti Dios.
ket sinabatko a kinaduelo dagiti innem
a mannakigubat nga oras,
isuda a pasurotna;
inurayko ti apgad nga isibug ti darikmat
kinasinnanggolko ti umir-irut a panagsisinninggalut
dagiti maadi-adi nga anges.
ngem nagsarimaddeng ti rumugrugma a pangta,
timmallikud a sipapakumbaba,
iti apros ti langit,
iti nainyesnekan a tanamitim…
penshadow
PENSHADOW 