NAGIMNASEN NGA ISALA

Kas salat’ agpinnasugnod, talikudannak
Ket magnaka;
Kamakamenka ket sagidek ‘ta abagam.
Iwagtengmo ti imak ngem kabigenka
Ket aglapus ti pakabuklam
Agingga iti lansad ti barukong,
Ditoyka a maisubli
A maisukog iti kawaw a kaunggak.

Kalpasanna, maymaysan
Ti anges,
Ti pitik,
Ti rikna.
Danggayanta ti ritmo
Ti patempateg:
Paginnakkubenta dagiti dakulap
Itag-ayta agingga iti langit.
Ipaayasta, yaddangta dagiti singin a sakata
Ket danggayanta dagiti giteb
Ti tudo a maisapri iti tawa.

A, anian a nagsam-it ti panagsinublianan
Kalpasan ti kuddot lamiis
Nga itden arbis dagiti mata
Ti tunggal maysa
Anian a nagimnas nga isala
Ti balse’t panagpinnasugnod
Ti nagkadua a napirsay nga ayat.

Ti BANNAWAG, Isssue Pebrero 16, 2009 a nakaipublikaran ti daniw, NAGIMNASEN NGA ISALA.

Agkak Koma ‘Ta Siding

Ti BANNAWAG MAGAZINE, November 10, 2008 Issue a nakaipablaakan ti daniw AGKAK KOMA 'TA SIDING.

Kayatko a pinasen nga agkan

‘Ta agpampannimid a siding

Iti ngarab dayta a bibig; siding

A kas tumamtammidaw nga init

Iti agsapa iti ngatuen ti apagukrad

A petalo ti nalabaga a hibiscus

Ngem napaidam dagiti ramay

Ti rabii ta agtukeng a mangilukat

Iti ridaw ni ridep a nagsampagaan

Ti minuyongam.

Ngem uray no kasta

Agur-urayak latta iti lukib dagiti nakakidem

A matak, umis-isem a mangkepkepkep

Iti agdadagsen nga arapaap a sika ken siak

Agpapasto iti duayya dagiti singin a giteb

Ti naginnakkub a barukong iti siled

Ti saan nga agpatingga a tagainep.

__________

BY CORAZON F. QUIAMAS

Maskara

 

Setiembre 1, 2008 BANNAWAG ISSUE, a nakaipablaakan ti daniw, MASKARA

‘Ton rabii padasekto
Manen a luktan ti kumkumotak
A baul a nakaipenpenan ti lagip; yukradkonto
Nga imaskara ti maysa kadagiti nakakupin
Nga isem; agsarmingakto iti kaunggan
Ti natarnaw a pusok; sapulekto ti paggapuan
Ti pitik a kubbuar ti barukong
Ket tumpuarto ti rupam iti tengnga
Ti agal-alikuno a tarigagay.
Iti agsapa sakbay a mapugsat
Ti darepdepmo, alistuakto nga ikamat
Nga isilpo ti daniw; maibasanto
Iti arasaas dagiti tumamtammidaw
A bulong, isu a nayurit iti mayam-amloy
A pinanid ti pul-oy; mangegamto
Manen dagiti maulit-ulit a mayar-areng-eng
A balikas, aglayag iti ayus nabara
A pammateg iti ingget lamiis
a dimmanum a riknam.
Ngem ammok nga iti kada
Kusay ti kaud ti panagdaton,
Awanto latta ti lamma a kaimudingan
Ti ruknoy a mabati iti rupa ti danum
Isu a baliwakto manen ti agsubli nga aglayag,
Ituredkonto latta a luktan ti kumkumotak
A baul a nakaipenpenan ti lagip; manen,
Yukradkonto nga imaskara
Ti maysa kadagiti nabatbati a nakakupin nga isem
A paglemlemmengan dagiti dandanin
Maibusuang nga agliplipias a mata.

_________

By CORAZON F. QUIAMAS

Dardarepdep Ngem Di Met Pudno

imetko ita ti agbingbingngi
nga isem ti bannawag
a pagbukasan kada lumitem
a malem; mariknak ti kalag-an
ti riknak a nagpespesan iti liday,
kas kalag-an ti namagmagan
a rabii a nagpaagsepak iti lua
sakbay a tinagikuanak ti ridep;
ta diak impagarup nga addaka
a mariingak iti lubong ti darepdep,
sutil a parmata, mawaw iti kaaddam.

kastoy ti kaakikid ti ragsak
no maibislinka, Aloha, kadagiti
tagtagainep, wen, uray laeng iti
tagtagainep; ta ammok a sika ti saan nga
agpatingga nga arapaap a singin
ti ubbaw a bigat ken saning-i
dagiti simmibeg a mata ti malem.

Nasikogan Nga Arapaap

Agsayamusomen
Ti inur-urayko a bannawag
A pinagbukar ti linnaaw
Dagiti naginnagneb a baug
A lantip ti isip ken tinta.

Diak mabilang
Dagiti pirgipirgis a pinanid
Dagidi eppes nga agpatnag;
Ti kanabsuok ti makulkol a panunot
Iti basura dagiti maulit-ulit a balikas
Nga el-ellekan ti nakamelmel nga ipes
Iti ngarab ti akikid nga utek.

Ngem itan ti bigat
A pinagbusel ti agalla-alla a rikna
Tapno adda met maitukit a bin-i
Iti mumalemen a minuyongan.