PENSHADOW

MAIKASIAMEN

penshadow — Mon, 21 Dec 2009 03:28:14 +0000

Maikasiamen daytoy a tawen

Nga agsarsaruag ti dalluyon ti Waikiki

Iti kadaratan ‘toy barukongko.

Agalli-allin nga agsublisubli ti lagip

Iti lugar a naggapuak kas kadagiti agtutukel

A darat nga ikurkuruay ti naapges a danum

Iti uneg ti kalub dagiti matak.

Nupay alisto la a gaw-aten dagiti arapaap

Ditoy Ala Moana nga ayanko a solar ti langit;

Isu a buya a naarkosan kadagiti bimmullalayaw

A pasdek ken bimmituen a balbalay;

Lugar a nakaipempenan kadagiti aglaplapunosan

A taraon ken pagan-anay iti panagbiag,

Adda latta saan a maartapan a nangayed

A suli iti kaunggak a nakailaminaan

Ti nakairuamak a sudi dagidi pagteng

Iti kataltalonan, kadan-awan ken abong

A nakasindian ti umab-aban a pabelo ‘toy biag.

DITOY EWA BEACH

penshadow — Sat, 05 Sep 2009 04:41:39 +0000

Bannawag Issue Setiembre 7, 2009 a nakaipablaakan ti DITOY EWA BEACH

Iti Fort Weaver road, kasla kulalanti

Nga agin-iniin dagiti lugan uray pay

Iti kariwetan nga agsapa.

Kada gilap ti payak a gangat

Ti agmimiray a sipnget, yanninagna

Ti ladawan ti namnama iti sango ti manibela

A sangsanggolen ti di mabannog a takiag

Tapno adda maipempen a bigat

Ti agdardarepdep a kasasaad.

Iti umaldaw, agparada dagiti bullalayaw

A nagbestida iti angep, agsasalada iti sirok

Dagiti agdadagsen nga ulep ken arrap nga init

Iti sikigan ti Diamond Head; isuda

Dagiti rangtay a mangitunda

Iti agtatapaw nga arapaap.

Ta nupay nasiit met dagiti dana ditoy

Kunada a paraiso, kas iti panagmulagat

Latta dagiti limmasong a mata;

Kas iti pannakabennat latta

Dagiti agpakil a piskel-

Tapno agpitik met latta dagiti barukong.

Ur-urayek

penshadow — Mon, 31 Aug 2009 06:40:55 +0000

salsaludsodek kadagiti bituen
no apay a naragsak
dagiti saltek iti sardam

ngem ikurosda ti raya ti lawag
iti bibigko ket kidmatandak iti rimat.
no damagek iti agragrag-o

a pul-oy iti arubayak,
alistuannak nga umay arakupen,
agkannak ket mailiwliwagko

ti ur-urayek a sungbat.
ngem iti panagturogko,
sumangbay latta ti saludsod

ket kas bangka nga agpaligpalig,
agkaraballikid ti al-alusiisen a riknak
iti rabaw ti naallon a muging

ngem iti ngatuek nauneg latta
dagiti sangaparis a suli ti kisame
kas singin a kallid ti mangis-isem

kaniak a rabii.
ammok nga adda sumangbay
kaniak; kas iti panagsingising

kalpasan iti panaglennek; kas
iti yuuli kalpasan
iti pannakakaruskos.

ammok nga adda iti likudak
ngem no taliawek, aglemmeng
iti sakaanak. ngem agparangto,

agparangto ket matnagto a kas
linnaaw nga agek iti kulay-ongan
a pingping ken rekkangan a bibig.

‘TOY KARAYO

penshadow — Tue, 07 Jul 2009 07:00:02 +0000

ita a malem, addaak

iti sangnguanam, kas saltek a saan

a makalipat nga umagep iti daga.

dimo koma tippayen manen

ti sangareppet a saringit ti daniw

tapno saan a maregreg dagiti petalo

ti busel ti pammateg;

kas iti panangiwadagwadag ti kadaratan

iti agsublisubli a nakatayada

a dakulap ti dalluyon;

kas iti saan a panangidandaneng

ti taaw iti rinibribon

a pannakalmes ti init.

ngem ketdi inton rabii, o, imnas

inton alupennaka ni ridep,

agtukiadkanto iti guyod

dagiti sansilmo a tagainep-

imutektekamto ti kinalidem

iti aglawlaw, isu ti anniniwan

ti nalulem a tangatang,

kas iti kinalulem

ti isasangbayko iti kaunggam.

ngem adtoyak ita a nakatangad kenka-

ikarik iti eternidad ti kinarimat dagiti bituen

manipud iti langit ti barukong

kalpasan a waknitam koma metten

dagiti ulep a kuyem dagiti matam kaniak.

IBATIKAN

penshadow — Fri, 19 Jun 2009 00:51:56 +0000

maulawak iti panagtulidtid

ti alimbasagen a panunot;

mapmaplengak iti pinangsagsagawisiw

ti pul-oy iti agkinnikinni a lumabas

a kanito; ta iti pay-ud

dayta a karinio, sumanay-a

dagiti bulong a makasay-up

iti nabang-i a kalman.

ita, lenglengngesennak ti takiag

ti ulimek; makarkaruskosak

iti reggaay ti agrutruting a saem

nga ab-abungotan ti sang-aw

ti abagat ti saan a naawatan

a rikna; kas ti panagsinnabat

ti lamiis ken pudot tapno agpingki

ti kimat ti gura ket gumluong

ti gurruod a rurodmo iti naulimek

a barukong; ngem no kunam

a tumangsitak, saan

ta kaykayatkon ti umadayo;

ammok a dinakto pulos taliawen,

saanmonto a maimatangan

a baklayko ti bugsong a naglaon

kadagiti impaakupmo a bimmato

a pungtot a kas dadagsenko a lunod

a mangitunda’t maminribu

nga innak pannakaidaramudom.

*Naipablaak iti BANNAWAG MAGAZINE, June 22,2009 Issue by CORAZON F. QUIAMAS

SARUNGKARANKANTO MANEN, HONOKA’A

penshadow — Tue, 16 Jun 2009 03:57:13 +0000

Ti BANNAWAG MAGAZINE, Issue Oktubre 5, 2009 a nakaipablaakan ti daniw ni Corazon F.Quiamas, SARUNGKARANKANTO MANEN, HONOKA'A.

panurnorekto manen dagiti ulep iti rabaw

ti dandani agukrad a maysa nga oras;

tammidawakto ti Maui, Molokai ken Lanai-

isuda a naiwarakiwak a petalo ti plumeria

iti taaw, bayat a sulsul-oyennak ti regget

nga agdisso iti pakabuklam.

kas kulibangbang iti Oahu,

umaykanto sublian ket agakar-akarakto

kadagiti minuyongam,

ipapaskonto manen a pidilen

dagiti kaddiram-os iti linnaaw a sabong

iti aglawlawmo; lukiblukibekto

dagiti namaris a payakko, kas iti pananglukibko

kadagiti namaris a panid ti saanko pay

a nayurit a daniw; kumpasakto ti kansion

dagiti tumatayab manipud iti birhen a kabakiram

ket iti berde a kabambantayam, ipintakto

iti muging ti buya ti biag a saboran

dagiti pangen ti baka ken karnero;

katikatekto dagiti atitiddog a daldalanmo

a namagsisilpo kadagiti matimtimpurok

a kinalasbangmo- lasuekto ditoy barukong

a kas agnanayon a tuktukonek a lagip;

ta iti rabii, parisannaka dagiti agrimrimat

ken agpipirutong a balbalay ditoy Ewa Beach

kas agtatapaw a bituen iti saklot

dagiti nalinak a dalluyon , kas kalinak

ti mabangbang-aran a rikna

bayat nga ipampannimidko ‘di natutudo

a kanito a panagkarapkarapko dita hardinmo.

DAGITI AGNAED ITI SIROK TI RUTROT A TANGATANG

penshadow — Fri, 29 May 2009 07:59:13 +0000

kapungponganda ti taaw.
musika ti dalluyon ti duayyada
kadagiti eppes a tagainep.

isuda dagiti nailanglangi a lasag
a binungon ti kimraang a kudil,
inkumotda ti keddel ti nalamiis

ken naapgad a pul-oy
a mamaglumen-mamagrutab
iti kasasaad; isuda kano ti akimbalay ti langit,

akimbubongan ti rutrot a tangatang,
bangbanglo a pay-od ti nadulpet nga angin.
isuda dagiti dapan-dapan nga agkatangkatang

kas iti panagkatangkatang
dagiti managsangit nga ulep.
agsapsapulda iti agrungarong a ramay

manipud kadagiti aglukat a tawa ti lugan
kadagiti nagkurosan dagiti kalsada
wenno iti minuyongan dagiti parke,

wenno iti gigis dagiti eskinita
tapno maapinan ti agkarabakab a tian-
tian a nakaungap iti kaunggan ti barukong

dagiti pagbasuraan. ket agbennat ti gannaan
nga anges kadagiti maibato a nagelgel wenno
naturno a balitok, ngem agluloken

ti nakem kadagiti maisayo
nga umamarilio a katay.
ket aglabas latta dagiti aldaw

a manmano a tumaliaw, tumaliaw man
ngem saan met a makaripar kadagiti agkaraidasay
a sennaay, kas kakarting dagiti umay ken pumanaw

a dalluyon, kas kapardas ti panagsepsep
dagiti lamok a saan a makamatan a masipat
dagiti agkakapsot a ramay.

ita, isuda kano dagiti mapapanaw
ta isuda kano dagiti mansa ti ngayed ti kadaratan,
dagiti mukat ti agdudongsa nga init,

dagiti bambanti iti sirsirok
dagiti immuong a kayo a pakadaitan
dagiti mapirsapirsay a kananakem.

ngem sadinno ngarud ita ti pagapunan
dagitoy nga agkukurrot a kalapati
nga aggi-innunna a tumuktok

kadagiti matnag a tinapay iti rabaw
ti agtigtig-ab a marmol a pagtutugawan,
no awan dagiti parke, dagiti aplaya.

kaanonto ngamin a matakupan ti butta-buttaw
a bubongan a tangatang a paglinlinongan
dagiti gabat a dapan iti bukodda met laeng nga Eden ti biag .

IPUPOSING

penshadow — Wed, 20 May 2009 08:25:54 +0000

ita ti rabii a rugi ti isisinayo-
napankayon iti bukodyo a siled
tapno sadiay, kaduaennakayo ni ridep.
kunayo, dadakkelkayon;
kunayo, dagiti kaedadanyo
addada metten iti bukodda a lubong
ket umapalkayo; kayatyon ti agmaymaysa
a mangarakup iti kinaimnas ti rabii.
ngem agubbog dagiti matak, annakko-
sapsapulek dagiti mayarpaw a babassit
a takiag iti barukong ken dagiti anghel
a rupa nga iladawan ti lawag ti silaw iti altar.
diakon makudkod dagiti bukotyo;
diakon mapikpik dagiti patongyo;
diakon maaprosan dagiti babassit nga uloyo
ta addakayon iti sabali a ridaw ti panagdakkel;
iti lubong ti panagsulsulo
nga aglugan kadagiti mapilapila
a pataw dagiti saan nga agkamtud a darepdep.

ngem palubosandak
nga iti kada rabii, agriingak
no lukagennak ti iliw-
agtil-ayak nga umay sumirip dita ayanyo
ket in-inayadek nga amloyen dagita buokyo
kas kainayad ti panangindayon ti pul-oy
kadagiti matmaturog a bulong iti asideg ti tawa;
kas kadungngo ti panangmatmat ti bulan
kadagiti agbukbukar a sabong ti orkidia iti paraangan,
ket punnuek iti nalamuyot a dayyeng ti siled,
ket maipinta ti nota ti ayat ti mail-ila nga ama
iti kambas ti imatang dagita nakakeppet a mata.

DITOY EWA BEACH

penshadow — Wed, 13 May 2009 01:04:54 +0000

Iti Fort Weaver road, kas kulalanti
Nga agin-iniin dagiti lugan uray pay
Iti kariwetan nga agsapa.

Kada gilap ti payak a gangat
Ti agmimiray a sipnget, yanninagna
Ti imahen ti namnama iti sango ti manobela

A sangsanggolen ti maap-apradan inana
A takiag tapno adda maipempen a bigat
Ti agdardarepdep a kasasaad.

Iti umaldaw, agparada dagiti bullalayaw
A nagbestida iti angep, agsasalada iti sirok
Dagiti agdadagsen nga ulep ken arrap nga init

Iti sikigan ti Diamond Head; isuda
Dagiti rangtay a mangitunda
Iti agtatapaw nga arapaap

Ta, nupay narigat ti biag ditoy
Kunada a paraiso , kas iti panagmulagat
Latta dagiti limmasong a mata;

Kas iti pannakabennat latta
dagiti sumuksuko a lasag-
Isu dagitoy ti mangtaginayon ti pitik

Iti bukod a barukong
Ditoy ken dagiti barukong dagiti napanawan
Dita Filipinas nga ina a daga.

DATON ITI SIKIGAN DAGITI NAREPPET A SABONG

penshadow — Thu, 30 Apr 2009 02:03:04 +0000

HONOLULU, HAWAII- A 43-year-old Waianae High School teacher was stabbed to death in a busy shopping center yesterday afternoon.

Asa Yamashita, of Ewa Beach, just left the Supercuts store at Ewa Town Center when a 25-year-old male allegedly stabbed her several times, witnesses and police said. The man was arrested soon afterward, and police recovered a kitchen knife that he allegedly used in the attack.

— Rob Shikina , Star Bulletin, posted February 28, 2009.

kas man mannanakaw
ni patay
a nangrabsut ti pitik
ti biag.

pinadasda a kinamat
ti kasla kimat
a saem
ngem nakaadayon-

simpok iti bakrang
ti lumlumnek
nga init ket nagsung-ab
ti lawag.

ket minantuan ti sipnget
ti nalamiis a lasag.
maysa manen a kandela
ti naiddep

a namaglulem
kadagiti pingping dagiti libro
kas ti panaglulem
dagiti naganus a matmata

kadagiti naikurtina a lua.
ti asuk nga aggapu iti nakettel
a pabelo, agpangatonto
a mangsuob

kadagiti nagkaadu a sabong
a nabati; dagitoy
dagiti sabong nga imbusel
ti natakaw a lawag-

agayamuom iti sabangan,
uray dagiti dalluyon
dida ninamnama
a tilmonenen ti sipnget

ti lampara
ket dagiti madama nga aglaylayag
iti puseg ti danum, maikawada
a di makaripar

iti agekenda a takdang.
ngem daytoy ti kari idiay Waianae
a pungan ti baybay iti laud:
ti beggang ti adal

saanto
a dumapo a dalangiding
ti lagip ti maysa a dimmapon
a pitik ti biag
dagiti agkabannuag.