Archive for the Daniw Iti Bannawag Category

SURAT ITI SARMING

Posted in Daniw Iti Bannawag with tags , on March 4, 2012 by penshadow

Ti Bannawag Magazine a nakaipablaakan iti daniw, SURAT ITI SARMING, Issue Pebrero 27, 2012

“Siksikanto latta,” inggudugod
Ti tammudok iti naangep a sarming ti banio
Bayat a pilit a bugbugguak ti bagik
Tapno maikkatka.
Napudot dagiti nginabras
Ti agtedted a danum iti ulok
Ngem kaskasdi nga agkutkutimermerak
A mangbuybuya kadagiti balikas
Nga in-inut a marunaw ken agpaayas nga agpapaba
Kas agayus a saem
A maitanem iti pagtapuakan ti danum.

Ta iti daytoy a Pebrero, diakon mapellesan pay
Iti kinapusaksak ti Mayo
A kas iti sigud.
Dagiti sabong adayodan
A lumtuad tapno agukradda iti abay
Ti pagdissuan dagiti pagaddanganta.
Ket uray iti dayta a siled, umuneg-rummuar
Nga agdakiwas ti pul-oy
Manipud iti tawa, kas maysa a mannanakaw
A manglibaslibas a mangitapuak kadagiti nabatbati
Nga angot ti panaglinnailo.

Ngem ti bileg ti danum ken angin
Saanna a mastrek ti pusok
Ken panunotko tapno mabugnawan
Wen maitayokda a pappapel ti kalendario
Dagiti imbatim a nagtagimayo a Pebrero.

________________________

*Naipablaak iti BANNAWAG MAGAZINE, Issue Pebrero 27, 2012

CANDLEGRIEF

Posted in Dandaniw, Daniw Iti Bannawag with tags , , , , on February 16, 2012 by penshadow

English Version of the Poem, LIDAY TI KANDELA, published in BANNAWAG MAGAZINE, issue January 26, 2012.

 
On this table for two,
my arms support the weight
of my forehead 
plowing the wooden surface
and this candle before my head
is weeping and the tears,
like a river 
strongly flowing
towards the sea.
 
(Is the salt  my pain
and the tasteless water your feeling?)
 
 
The fading flame is so lonely
but  still  mirroring 
brightly your face,
kissed by the thickening darkness
that drinks your empty chair in front of me..
 
( Did I come as a moth tonight
or am I  really a moth as a powdery residue
of  my sobbing blaze? )
 
I don’t hear any other sound
except that very sweet 
melody of the band
but  oh, how heartbreaking does it bring!

LIDAY TI KANDELA

Posted in Daniw Iti Bannawag with tags , on January 28, 2012 by penshadow

Ti Bannawag Magazine, Enero 30, 2012, a nakaipablaakan iti daniw ni Corazon F Quiamas, LIDAY TI KADELA.

Iti daytoy a lamisaan
a para laeng iti dua,
dagiti takiagko, bagbagkatenda
ti nakadisso a mugingko,
ket daytoy kandela iti las-ud ti ulok
agsangsangit ket ti luana,
kas iti naapres nga agus ti karayan
a maabbed iti natibnokanta a puyupoyan…

(Ti kadi apgad ita ti sanaangko
ket ti tamnay ti riknam?)

Ti agmimiray nga apuy, nakalidliday
ngem mayanninawna ‘ta naslag
a ladawam nga ag-agkan
ti bumengbengbeng a sipnget
dita kasinnangok a kawaw a tugaw.

(Immayak kadi a legleg ita a rabii
wenno leglegak kadi a talaga a dumapo

iti sinindiam
nga agan-anug-og nga apuy?)
Awanen ti sabali a mangngegko
laksid iti apounayen a sam-it
a tokar ti banda
ngem anian a saem itan ti lukibna.

CFQ/Hawaii

PANAGPINNAKADA

Posted in Daniw Iti Bannawag with tags , , , , , on September 30, 2011 by penshadow

Ti Bannawag Magazine, Issue Oktubre 3, 2011, a nakaipablaakan ti daniw, PANAGPINNAKADA

 
Sibabara pay laeng kadagiti limbang ti puted a daniw
dagiti  agek nga impatayabmo kaniak iti pungto
ti aldaw a nasken a bisngayennata dagiti dua a dalan.
Daldalapadapek a kanayon
iti bibig
iti pingping
iti muging ti kada agtabon a malem,
ti kada agukrad a bannawag
ti lamuyot ken ayamuom dagidi  naibislin nga agek iti pul-oy.
Adayon ti nagtengko, siguro kas iti kaadayo met ti nagtengmo
ket no taldiapak ti lugar a nagalus-osan dagiti dakulapta
diakon maripar  pay dagiti dua a nabisngay nga anniniwan
ta minawmawen ti sipnget dagiti nangalun-on
kaniak a kabakiran, inartapanen dagiti linasatko a kabatuan.
Ngem bayat ti yaaksawko ken yaaksawmo
pumigpigsa ti sul-oy ti lagip ket akuek-
umun-uneg ti kaaddam kaniak, iti abayko.
Kaaduan idi a masarakanka kadagiti pisikal
a kinalasbang dagiti sabong- sipud panagbusel
ken panagbukar; kadagiti  pakabuklan dagiti bantay
a nagbestida kadagiti angep wenno kadagiti lapayagda
a nagaritos kadagiti bullalayaw.
Ipaduyakyakko kenka ita:  
ti rupam
ti aminmo kaniak
awan unayen iti pangngarig a masarakan laeng
iti gagangay a kudil ti nakaparsuaan.
Ti kaipapanam, limmansaden ket naun-uneg pay
ngem iti lansad dagiti banga ti taptapuyo nga inkutukot
dagidi sikota a natapok.
Ammuem, maysaka nga ubbog
a makitinnukod iti kalindaw ti tumiktikag a kaunggak
ket kadagitoy la a mariknak,  ta ti gayam panangbisngay
kadata dagiti dua a dalan ket isu ti pirgis a namagsaip iti kaipapanam.
 
 
By Corazon F. Quiamas
Ewa Beach, Hawaii 96706
 

DAGITI NAGAWANGAN

Posted in Daniw Iti Bannawag with tags , on June 16, 2011 by penshadow
 
 
Kastoy ti mangtiliw iti arapaap, ubbing:
ibuangmo dagiti sumagsasangapulo a sako
iti kutkutimermeren a sementado a datar iti agsapa.
Kumaradakad nga ipataruytoymo dagiti nagawangan
iti danum ken soda a plastik a botelia ken lata
sursuroten a pagaallabatan a tiliwen tapno kamadaen
dagiti nalamuyot a dua a paris a babassit nga ima.
Dagiti makapungtot a nagkampo nga ipes, alutiit, kuton
mabuak, agkarayamda- adda agguyab, agsanaltek
ken kumagat ngem awan pannakaalingget
dagiti naganus a saka. Kayatda a tukmaan
ti kalikagum nga irosrosarioda kenka: pagsinsinan
a video game ken sapatos…
 
Kalpasan a maisimpa dagitoy a wara, kagiddandanto metten
a maawan ti nanumo a pisikal a buya
dagitoy naibalangtad a botelia ken lata ngem saan
a magatadan daytoy nga obra maestra
ta impintamon a pagsarmingan iti sumaruno a bigat
ti lumawlawa a panunotda.

Ti Bannawag Magasin, Issue Hunio 20, 2011, a nakaipablaakan ti daniw, DAGITI NAGAWANGAN.

By Corazon F. Quiamas

MAKARKARMAAK, SABONG

Posted in Daniw Iti Bannawag with tags on May 10, 2011 by penshadow

Ti Bannawag Magazine, Issue Mayo 9, 2011, a nakaipablaakan ti daniw, MAKARKARMAAK, SABONG

Sige, agsaoka, tungtongannak.
Iti sanguanam, ipigketnak ti naengkantuan
A liriko dagita matam. Singin a mata-
Agbaliwbaliw iti maris,
 
Payak ti kulibangbang-bakir
Iti Mayo. Agkeppekeppet. Paypayanda
Ti alimbasagen a barukong.
Pati dagiti sampaga ditoy natutudo
 
A Manoa, wenno dagiti kumarukkok a pagaw,
Agsardengda amin nga agsala’t hula-
Agallingag, matmatandaka.
Ngem maimayengak latta, Sabong
 
Iti pangis a karuotan iti sakaanam.
An-anninawek: makitak koma
Uray laeng saragasag ti naingpis a pakabuklak
Iti abay ti nakadalupisak nga anniniwam.
 
-Corazon F. Quiamas
 
 
 

AGNANAYONEN A PEBRERO

Posted in Daniw Iti Bannawag on January 3, 2011 by penshadow

Ti BANNAWAG MAGAZINE a nakaipablaakan ti daniw, AGNANAYONEN A PEBRERO.

Pebrero idi immayak dita Purok Silaw
ket iti panagawidko, inikkam ti biag
ti aglawlaw- nariparkon
ti kinalangto ti buya iti amianan ti balayyo,

Ti kinapusaksak ti sabong dagiti papait
a madalanak. Nagtagipayak dagiti sakak
a nangdaliasat kadagiti tambak ket kinaduetok
ti sagawisiw dagiti malabsak a billit.

Sipud idin, no umayka bisitaen, maimaskon
ti agsida kadagiti prituem a tilapia, dalag
a masarwagan iti piskaria; ti dengdengem
a kassukdal a pakak; wenno ti kilnatem

A paltong ken  sabong ti marunggay.
mariknak metten ti nalamuyot nga arakup
ti sumarabo a pul-oy manipud
iti sangamataan a kataltalonan. Ket agingga ita,

Ta  addaantan iti bukod nga ikub, ditoy adayo
ken sangkailling a daga dagiti plumeria ken kannaway,
Pebrero aminen kadata ti ngayed ken ayamuom
dagiti lumabas nga aldaw, bulan  ken tawen.

*Naipablaak iti BANNAWAG MAGAZINE, Issue Pebrero 14, 2011, p. 18.

By Corazon F. Quiamas

Follow

Get every new post delivered to your Inbox.