ITAN TA IBBATANNAK, ANGHELKO

 

Paspasikigan dagiti dua a bukel  

a matak daydi  panangsilud 

iti  amak kadata iti umuna a gundaway

a pagtinnangepenta dagiti dakulap

ngem nagpannuray 

ti naisangsangayan a giteb  

inawidmo ti imak 

ket kas dua a kabbulos nga anghel

tinayaktakta ti ingget ngayed a tangatang

nagay-ayamta  iti  hardin ti langit 

ket kadagiti panawen a mabannogta 

pamrayam nga ipurosannak 

iti darangidang a bituen

isubom kaniak ket isublatko 

met nga isubo kenka.

 

Ita, madlawko ti ilulokay

ti petpetmo ket sul-oyennakon ti lindaw

ti panagmaymaysa

nangaton ti nagtengta ket no  matnagak

laglagipem a sika ti pigsa dagiti payakko

ngem no itulokmo a maalus-osak 

kadayta dakulap

ikidemkon ti agsuek a kas layap

a maitanem iti mangliwengliweng 

a kasipngetan

ania kadi aya ti pakaigapuanna

gapu kadi ta addaka iti panawen 

ti panagsusulbod

ket addaak met iti panagreregreg

a saan a pulos a makapagsukot

ngem no koma agkapanawenanta,

baybay-annak ngata  a kas ita?

 

Ta apay  ngamin a nangsemiliaka 

iti ayat manipud iti nakidser a riknak 

inayabannak tapno padaklenta 

iti nadam-eg a panawenmo 

ket ita, ay-ayamenen ti naganus a riknam

a rurosen ti riknak?

ngem daytoy ti ibagak kenka:

uray ti angin

ti linnaaw

ti bulan

dagiti bituen

mammaminsanda man nga umannamong

iti kinapudno ti agdama a kasasaad

maisaburto iti daga

ti matnag ken agrupsa nga ayatko

a ganagan ti madama 

nga agrangrangpaya

a lubongmo.

About these ads