KAMANNANIW

manawnaw met ti bara ti panaglalangen
iti salukob ti sangatangatangan
a kalawa ti ulimek.
ulimek nga abbong dagiti agkaraidasay
nga arapaap, bayat iti naundayen a panagpipinningki

dagiti tadem dagiti agsisinniliasig
a kinahenio ken kalkalikagum;
degdegan ti bumbumsog a pingping
ti pul-oy a mangpalpalamiis
latta iti gagar-abrasa dagiti kumkumleb

a balikas a makikinnumosta,
makirinnay-aw ken manginspirar
tapno rumegta koma nga agkali
ti panunot iti minas nga imet
ni Kultura Ilocana.

kamannaniw, denggem:
dinak koma ibati iti law-ang
a diak maibugasan iti kaipapanan.
kaduaennak a kas sallapingaw
nga agampayag tapno makitak

ti direksion ti makaulaw ken umir-irot
nga aligusgos ti daga a rinarames
ti nakaparsuaan.
sumpekta iti eropuerto a kabakiran-
pilitenta nga aningasen iti ungto

ti ulimek ti ayug ti orkestra
dagiti napadisi a tumatayab;
iti taaw, isublita ti kinabirhen ti danum
manipud kadagiti allon ni lagip
a lagtolagtuen dagiti naamo

ken rinaraay nga ik-ikan-
ta pati ngaminen iti barukong
ti baybay ket agkebbakebba
kadagiti agkarabettak a mitsa
ti rigat ti biag?

inta iti taltalon-
agiddata iti berde a karuotan a naarpawan
iti makalindaw a rengngat ti tikag;
burasenta dagiti arbis a kakaemen
dagiti nakapurpuraw a bibig dagiti ulep

ket iti ungto ti alinuno
dagiti nagsusupadi
a pampanunot, idiay nga itukitta
‘toy bin-i ni lagip tapno agruting
iti dakulap ti makaliplipaten nga agdama.