TULONGANNAK A MANGIDANIW

 
isuronak a mangidaniw
iti yuulog ti init
tapno ikur-itna iti danum
ti rikna nga inlamina dagiti tugot

ti nagmalem iti tapoktapok
ken naasok a tangatang; kasanok
nga ibugasan ti nalabbasit
a muging ti laud a mukon iti yuulog

ti saltek tapno umagep iti daga,
kalpasan a naiwaragawagna
ti maris ti anges nga angsen
ti barado nga agong

iti sumaruno nga aldaw, bulan,
tawen wenno siglo a sirutsirot
iti kasisiglot iti nagkaadu nga arapaap
ti lasag a puon ti nadaras

nga ilulong-aw ngem pakailutlotan met
gayam; tulongannak a manggammat
ti nagalis a panunot a sumrek-rumuar
kadagiti naluneng nga abot ti turay

ta kasla paltat a bumanang-es,
sumangdo kaniak, sumingil ket kumilikili
ti ut-ot dagiti saan a nagbanag nga insaltek
dagiti nangyabrasa iti kari

iti piglapiglat a ridaw ti puso
dagiti nakudrep a mata
ken iti nabangles a balikas
dagiti nagpabanias a simmuksok a dila-

wen, iti kaawan sungbat
no apay nga adda maibusel
ngem di met agukrad;
ta awan met ngamin

biag ti plastik a sabong
a maipapa-ayat kadagiti padak
a mamati iti itlog a kari a di met
mapessaan; aglalo no bulonan

ti kanalbuong ti umas-asok
a ngiwat ket kasla an-anakan nga aso
ti kararua a mangibaag
ti sangsangadangan a biagna-

agangek ket dilpatanna ti sileng
ti pirak sa idilpatna met
kadagiti ngiwat dagiti agang-angek
nga uken a mangdildilpat iti tapok
iti uneg ti nakaraykay nga abot;

a, tulongannak…

tulongannak a mangidaniw
ti paragpagan a kasasaad a kibkibkiban
dagiti bao nga umuli-umulog
iti aglatlati nga alambre ti killo a linteg.