Orkidia, Dimo Koma Ipawil A Matmatanka

Corazon Fermin Quiamas
7/11/2008 6:07:21 PM

Apay ‘ya , Manongko Bulan, a mulmulenglengannak-
Adda kad’ piltak iti rupak? Adingko Orkidia, awan
Awan. Pakawanennak ngem diakto mauma
A mangmatmatmat ‘ta dayag; aldaw, rabii
Baludmo latta dagiti matak. Aldaw, kunam
Manongko, ngem napanam ngarud ‘tay aldaw? Addaak,
Adingko ngem saannak a naripar; ta ti lawag
Ti init innak sinapawan; ngem ti raniag ti pusok
Saannanto a malingdan. Bay-am a bantayanka
Kada rabii; kumotanka iti apros ti lawag; itulokmo
A maibislinak kadagita bioleta a petalo;
Ta saksik ti kakaisuna a bulsek a pul-oy, isagidna
‘Toy arasaas a sika, Adingko Orkidia, kinayawam ‘toy riknak.

Manongko Bulan, sika met; daniwannak manen;
Kadagita nasamit a dila a yagek ti nabara nga apros
Ta lawag; agyamanak no salukobannak nga agpatnag
Ta nalamiis ditoy yanko a kannag; bay-am a panunotek,
Imutektekak ti idiaydiayam nga ayat; ngem no marsaakton
Dagiti petalok, ket ungkayton a labus ‘toy kayawko;
Silawkonto kad’ pay la’ng dagita matam; talinaay
Iti barukongko no sumken ni ridep?

Kunak kenka, Adingko, sika ket sika ti biagko
Uray lennedton ti panawen, irimatdakto
Latta dagiti bituen; ikuldingnakto ti pul-oy;
Ipalagipnakto ti darepdepmo; ta uray maibuston
Ti petalom; agpukaw man ti marismo; ditoy
Kaunggak, sika ti Orkidia a bioleta; rangpaya ti pusok.

Copyright 2008 By Corazon F. Quiamas